ڪراچي: ڪراچي ۾ مبينه پوليس مقابلي ۾ 2 ڦورو مارجي ويا جڏهن ته 4 کي گرفتار ڪيو ويو آهي. پوليس موجب ڊالميا واري علائقي شانتي نگر ۾ پوليس اهلڪارن جو ڪار لفٽرن سان مقابلو ٿي پيو جنهن ۾ هڪ ڪار لفٽر مارجي ويو، ٻئي کي گرفتار ڪيو ويو جڏهن ته جوابدارن جا 2 ساٿي فرار ٿي وڃڻ ۾ ڪامياب ٿي ويا.
ڪار ڊرائيور ٻڌايوت ه گلستان جوهر ڀرسان 2 موٽر سائيڪلن تي 4 جوابدارن روڪيو ۽ هٿيار ڏيکاري ڪار ڦر ڪري ورتي، پوليس کي اطلاع ڏني ته پوليس طرفان جوابدارن جو پيڇو ڪيو ويو.
ٻئي پاسي پوليس ٻڌايو ته سائيٽ سپر هاءِ وي انڊسٽريل ايريا ۾ ڦورن شهري کي روڪيو، شهري جي نه بيهڻ تي ڦورن فائرنگ شروع ڪري ڏني ۽ سرجاني جي علائقي ۾ فرار ٿي ويا.
پوليس موجب فائرنگ سبب زخمي شهري فرحان کي عباسي شهيد اسپتال منتقل ڪيو ويو جتي هو علاج دوران فوت ٿي ويو. شهري جي سڃاڻپ فرحان جي نالي سان ٿي آهي مقتول فرحان هڪ ٻار جو پيءُ هو. قائداعظم ڪالوني ۾ ميڊيڪل اسٽور مان ڦر ڪندڙ ڦورن سان به مقابلو ٿيو جنهن ۾ زخمي سميت 2 ڦورن کي گرفتار ڪيو ويو.
پاڪ ڪالوني ۾ گينگسٽر ڪاشف سنڌي جو ويجهو ساٿي وسيم بنگالي مقابلي دوران مارجي ويو. جڏهن ته سعود آباد مان رمضان نالي ڦورو کي مقابلي کان پوءِ زخمي حالت ۾ هٿيارن سميت گرفتار ڪيو ويو. پوليس موجب سهراب ڳوٺ جمالي پل ۽ شاهه لطيف جي ڀرسان فائرنگ سبب 2 ڄڻا زخمي به ٿيا.
