اسلام آباد (م ڊ) پاڪستان تحريڪ انصاف (پي ٽي آءِ) گذريل رات کان پارٽي اڳواڻن ۽ ڪارڪنن کي گرفتار ڪرڻ واري حڪومتي قدم تي عدالت سان رجوع ڪرڻ جو فيصلو ڪيو آهي. ان سلسلي ۾ پريس ڪانفرنس کي خطاب ڪندي شاهه محمود قريشي چيو ته اسلام آباد ۾ پرامن مارچ اسان جو آئيني ۽ قانوني حق آهي ۽ اسان پنهنجي آئيني ۽ قانوني حق جي تحفظ لاءِ عدالت وڃي رهيا آهيون.اڳوڻي وفاقي وزير شاهه محمود قريشي پاڪستان تحريڪ انصاف جي اڳواڻن سان گڏ پريس ڪانفرنس ڪندي چيو ته ڪارڪنن ۽ اڳواڻن کي گرفتار ڪرڻ جا اهي حربا ماضي ۾ به ڪم نه آيا آهن ۽ مستقبل ۾ به ڪم نه ڪندا.هن چيو ته گذريل رات کان جنهن فاشزم جو مظاهرو ڪيو پيو وڃي ان مان حڪومت جي مونجهاري جو اندازو لڳائي سگهجي ٿو.هن وڌيڪ چيو ته ڪريڪ ڊائون اسان جي لانگ مارچ کي روڪي نه ٿو سگهي ۽ شايد کيس خبر ناهي ته اها تحريڪ پي ٽي آءِ کان گهڻو اڳتي نڪري وئي آهي.اڳوڻي وفاقي وزير چيو ته اڄ پاڪستان جي خودمختياري ۽ حقيقي آزادي تي يقين رکندڙ هر پاڪستاني ان تحريڪ جو حصو بڻجي چڪو آهي، شاگرد، پروفيسر، ڊاڪٽر، انجنيئر سميت زندگي جي هر شعبي جا ماڻهو ان تحريڪ ۾ شامل ٿيا آهن.هن چيو ته هن وقت نئين چونڊن جي راهه ۾ سڀ کان وڏي رنڊڪ آصف علي زرداري آهي ڇاڪاڻ ته کيس خبر آهي ته جيڪڏهن هاڻي چونڊون ٿيون ته کيس ڪجهه به نه ملندو.هن وڌيڪ چيو ته اسان جي سوچ بلڪل واضح آهي ته اسان کي آئين ۽ قانون جي دائري ۾ رهي پنهنجي جدوجهد جاري رکڻي آهي، اسان کي ٻاهرين غلامي قبول نه ڪرڻي آهي ۽ اسان کي اندروني فاشزم خلاف وڙهڻو آهي.
91
