اسلام آباد: پاڪستان تحريڪ انصاف(پي ٽي آءِ) پنجاب اسيمبلي ۾ اعتماد جي ووٽ وقت غير حاضر رهندڙ 2 ميمبرن کي شوڪاز نوٽيس جاري ڪري ڇڏيا آهن.
رپورٽ موجب تحريڪ انصاف پارٽي پاليسي کان ناراض ميمبرن خلاف ڪارروائي جي شروعات ڪري ڇڏي. پنجاب اسيمبلي ۾ اعتماد جي ووٽ دوران غير حاضر رهندڙ 2 ميمبرن کي شوڪاز نوٽيس جاري ڪري ڇڏيا جن ۾ ممومنه وحيد ۽ فيصل فاروق چيمه شامل آهن.
14 جنوري تي ٻئي اڳواڻ ذاتي حيثيت ۾ پارٽي چيئرمين عمران خان جي آڏو پيش ٿيندا جن کي آرٽيڪل 63 اي جي تحت ڪارروائي کي منهن ڏيڻو پئجي سگهي ٿو.
پارٽي طرفان جاري ڪيل شوڪاز ۾ چيو ويو آهي ته اوهان بطور پارلياماني ميمبر پي ٽي آءِ جي چٽي پاليسي کان انڪار ڪيو. چٽين هدايتن باوجود ٻنهي ميمبرن ان تي عمل نه ڪيو.
