ڪراچي: ڪراچي ۾ بي لغام ڊمپر ۽ واٽر ٽينڪر مافيا جي تيز رفتاري سبب ڪورنگي، ملير ڪينٽ، سپر هاءِ وي ۽ يونيورسٽي روڊ تي پيش ايندڙ مختلف واقعن ۾ 2 عورتن سميت 4 ڄڻا فوت ٿي ويا جڏهن ته قانون لاڳو ڪندڙ اداري جي 3 جوانن سميت 4 ڄڻا زخمي ٿي پيا.
ريسڪيو اختيارين ٻڌايو آهي ته سپر هاءِ وي جمالي پل اٽڪ پمپ جي ڀرسان نامعلوم گاڏي جي ٽڪر سبب 2 واٽهڙو عورتون فوت ٿي ويون، واقعي کان پوءِ گاڏي وارو فرار ٿي وڃڻ ۾ ڪامياب ٿي ويو.
ٻيون حادثو يونيورسٽي روڊ سماما شاپنگ مال جي ڀرسان پيش آيو جتي تيز رفتار واٽر ٽينڪر موٽر سائيڪل سوارن کي ٽڪر هنيو جنهن سبب منير نالي نوجوان ٿڏي تي فوت ٿي ويو جڏهن ته ٻيو محفوظ رهيو، پوليس ٽينڪر کي قبضي ۾ وٺي ڇڏيو جڏهن ته ڊرائيور فرار ٿي ويو.
ڪورنگي گودام چورنگي تي نامعلوم گاڏي جي ٽڪر سبب موٽر سائيڪل سوار فوت ۽ هڪ زخمي ٿي پيو. اهڙي طرح صفوران ڳوٺ مان ملير ڪينٽ ويندڙ قانون لاڳو ڪندڙ اداري جي گاڏي ۽ ڊمپر ۾ ٽڪر ٿيو جنهن جي نتيجي ۾ قانون لاڳو ڪندڙ اداري جي گاڏي تباهه ٿي وئي ۽ 3 جوان زخمي ٿي پيا. ڊمپر ۽ ڊرائيور کي حراست ۾ وٺي پوليس جي حوالي ڪيو ويو.
