ڪراچي: ڪراچي جي علائقي ڪلفٽن گندا نالا اسٽاپ ڀرسان مبينه پوليس مقابلو ٿيو آهي پر ٻنهي طرفان فائرنگ جي ڏي وٺ دوران 4 ڏوهاري مارجي ويا آهن.
پوليس موجب ڪلفٽن پوليس ۽ سي ٽي ڊي گڏيل طور تي اسنيب چيڪنگ ڪري رهي هئي ته جوابدارن کي اسنيپ چيڪنگ جي دوران بيهڻ جو اشارو ڪيو ويو. جوابدارن پوليس تي فائرنگ ڪري فرار ٿيڻ جي ڪوشش ڪئي پر ٻنهي طرفان فائرنگ جي ڏي وٺ دوران 4 ڏوهاري مارجي ويا.
پوليس موجب مارجي ويل ڏوهارين جي قبضي مان 4 پستول ۽ ايمونيشن سان گڏ 2 موٽر سائيڪلون به هٿ ڪيون ويون آهن جڏهن ته ڏوهارين جا لاش جناح اسپتال منتقل ڪيا ويا.
پوليس موجب مارجي ويل ڏوهارين 6 نومبر تي ڪلفٽن ۾ شهري کي قتل ڪيو هو. فائرنگ سبب فوت ٿي ويل شهري جي سڃاڻپ سعيد جي نالي سان ٿي، مقتول سعيد قانون لاڳو ڪندڙ اداري جو اڳوڻو اهلڪار هو. مارجي ويل ڏوهارين شهري سعيد کي پئسا ڦر ڪرڻ دوران قتل ڪيو هو.
ڊي آءِ جي سائوٿ اسد رضا موجب مارجي ويل جوابدارن جي سڃاڻپ ٿي وئي آهي، جوابدارن ۾ عبدالستار، سري چند، راج ڪمار ۽ نواب احمد شامل آهن. ڊي آءِ جي سائوٿ چيو آهي ته مارجي ويل ڏوهارين جو ڪرمنل رڪارڊ به آهي. جوابدار ڦر ۽ قتل جي ڪيترين ئي ڪاررواين ۾ ملوث هئا جڏهن ته دهشتگردي جي ڪارروائين ۾ به انهن جي ملوث هجڻ جي تصديق ڪئي پئي وڃي.
