نيوسعيدآباد: نيوسعيدآباد ڀرسان ڳوٺ بکر جمالي ۾ هٿياربندن گهر ۾ فائرنگ ڪري عورت ليڪچرار کي قتل ڪري ڇڏيو.
تفصيل موجب نيوسعيدآباد ڀرسان ڳوٺ بکر جمالي جي رهواسڻ مسمات افشان زال امداد جمالي عمر 32 سال کي نامعلوم هٿياربندن فائرنگ ڪري قتل ڪري ڇڏيو.
پوليس موجب بکر جمالي جي رهواسڻ مقتوله افشان کي 2 مهينا اڳ 17 گريڊ ۾ ليڪچرار جي نوڪري ملي هئي، جڏهن ته سندس مڙس بيروزگار آهي. پوليس اختيارين موجب مقتوله کي گوليون هڻي قتل ڪرڻ کان پوءِ ان جو مڙس ۽ ساهورا گهر مان غائب آهن.
قتل ٿيل عورت جو لاش تعلقه اسپتال نيوسعيدآباد آندو ويو جتي ڊيوٽي ڊاڪٽرن سندس فوت ٿيڻ جي تصديق ڪري ڇڏي. پوليس جو ان حوالي سان چوڻ آهي ته شروعاتي جاچ مان اهو لڳي رهيو آهي ته عورت ليڪچرار کي سندس مڙس قتل ڪيو آهي. مقتوله عورت جي مڙس جي گرفتاري لاءِ ڇاپا هنيا پيا وڃن.
