اسلام آباد: پاڪستان پيپلز پارٽي جي چيئرمين بلاول ڀٽو زرداري چيو آهي ته سنڌو پاڻي معاهدي جي معطلي انسانيت خلاف ڏوهه آهي، پاڪستان دهشتگردي برآمد نه ڪري رهيو آهي پر پاڻ دهشتگردي جو شڪار آهي، ڀارتي حڪومت غير ذميواري جو مظاهرو ڪري رهي آهي، پاڪستاني قوم خوف ۾ رهڻ نه سکيو آهي.
پهلگام فالس فليگ آپريشن کان پوءِ ڀارتي جارحيت جي حوالي سان قومي اسيمبلي ۾ ڳالهائيندي بلاول ڀٽو زرداري چيو ته پهلگام واقعي کان پوءِ، متاثرين جو رت وهڻ کان اڳ ئي، ڀارت پاڪستان تي الزام هڻڻ شروع ڪري ڇڏيا، سرحدون بند ڪري ڇڏيون ۽ نتيجن جي ڌمڪيون ڏيڻ شروع ڪري ڇڏيون.
هن چيو ته مان پاڪستان ۽ دنيا جي ماڻهن کي ٻڌائڻ چاهيان ٿو ته هن ڏوهه ۾ پاڪستان جو ڪو به هٿ ناهي، اسان دهشتگردي برآمد نه ڪري رهيا آهيون پر اسان پاڻ دهشتگردي جو شڪار آهيون.
بلاول ڀٽو چيو ته دهشتگردي صرف لاشن تي حملو ناهي، اهو سچائي، امن ۽ تهذيب تي حملو آهي، دهشتگردي بم ڌماڪو يا مارڪيٽ ۾ فائرنگ ناهي، وڌندڙ ناانصافي تي عالمي خاموشي دهشتگردي آهي، مظلومن جي ڳچيءَ کي بوٽن سان دٻائڻ دهشتگردي آهي، گهر کي بلڊوزر سان اوندهه ۾ تبديل ڪرڻ دهشتگردي آهي، دهشتگردي اهو ڪرفيو آهي جيڪو ڪلاڪن تائين نه پر ڏهاڪن تائين جاري رهي ٿو.
هن چيو ته ڀارت دهشتگردي سان وڙهڻ جو دعويٰ ڪري ٿو، پر اسان پڇون ٿا ته توهان دهشتگردي سان ڪيئن وڙهندا آهيو جڏهن ته توهان پاڻ ڪشمير ۾ رياستي دهشتگردي جا مجرم آهيو، جڏهن توهان پاڻ والاريل وادي ۾ هر روز قانون ٽوڙي رهيا آهيو، ته پوءِ قانون جي ڳالهه ڪرڻ توهان کي زيب نٿو ڏئي.
ڀارتي حڪومت کي خطاب ڪندي پ پ چيئرمين وڌيڪ چيو ته جڏهن توهان جا هٿ ڪشميري مائرن جي ڳوڙهن، ٻارن جي چيخن ۽ بي جان انسانن جي خاموشي سان رنگيل آهن، ته توهان اخلاقي برتري جي ڳالهه نٿا ڪري سگهو.
هن چيو ته پاڪستان ٻاهرين حمايت يافته، نظرياتي ۽ انتهائي بي رحم دهشتگردي کان متاثر آهي، اسان پنهنجي فوجي اهلڪارن ۽ اسڪول جي ٻارن کي دفن ڪري ڇڏيو آهي، اسان پنهنجن زخمن سان اڪيلا بيٺا هئاسين ۽ دنيا اسان کي وساري ڇڏيو هو.
