لاهور: چيف اليڪشن ڪمشنر سڪندر سلطان راجا چيو آهي ته عام چونڊن جو وقت ويجهو آهي. سڀني کي ملي منصفاڻيون ۽ شفاف چونڊون يقيني بنائڻيون آهن.
وزيراعليٰ هائوس ۾ چيف اليڪشن ڪمشنر سڪندر سلطان راجا ۽ نگران وڏي وزير محسن نقوي جي صدارت هيٺ اجلاس ٿيو جنهن ۾ اليڪشن ڪميشن چئني صوبائي ميمبرن ۽ پنجاب ڪابينه ميمبرن شرڪت ڪئي. جڏهن ته اجلاس ۾ عام چونڊن جي لاءِ اليڪشن ڪميشن جي انتظامن ۽ پنجاب حڪومت جي تيارين جو جائزو ورتو ويو.
اجلاس ۾ عام چونڊن جي لاءِ سيڪيورٽي انتظامن تي به بريفنگ ڏني وئي ۽ ان دوران عام چونڊن جي پرامن، آزادانه ۽ منصفاڻين طريقي سان يقيني بنائڻ جي عزم جو اظهار ڪيو ويو.
عام چونڊن جي سلسلي ۾ نگران پنجاب حڪومت اليڪشن ڪميشن سان گڏ ڪوآرڊينيشن جي لاءِ فوڪل پرسن مقرر ڪندي.
اجلاس ۾ ڳالهيون ڪندي چيف اليڪشن ڪمشنر چيو ته عام چونڊون مقرر وقت تي ٿينديون. چونڊن جو وقت ويجهو آهي. سڀني کي ملي منصفاڻيون ۽ شفاف چونڊون يقيني بنائڻيون آهن جنهن جي لاءِ اليڪشن ڪميشن تيار آهي.
هن چيو ته نگران پنجاب حڪومت کي فري اينڊ فيئر چونڊن جي لاءِ مڪمل سپورٽ ڪنداسين. پنجاب حڪومت جي هينئر تائين جي قدمن سان مڪمل طور تي مطمئن آهيون. 30 نومبر تائين تڪ بندين جو مرحلو مڪمل ٿي ويندو.
اجلاس ۾ ڳالهيون ڪندي نگران وڏي وزير محسن نقوي چيو ته اليڪشن ڪميشن سان عام چونڊن جي پرامن ۽ شفاف طريقي سان منعقد ڪرڻ جي لاءِ هر ممڪن تعاون ڪيو ويندو. پنجاب ۾ چونڊون آزادانه طريقي سان منعقد ڪرائڻ يقيني بنائڻ جي لاءِ فول پروف انتظام ڪيا وڃن.
اليڪشن ڪميشن آف پاڪستان سنڌ جي ميمبر نثار احمد دراني، بلوچستان جي ميمبر شاهه محمد جتوئي، ڪي پي ڪي جي ميمبر جسٽس(ر) اڪرام الله خان، پنجاب جي ميمبر بابر حسن بهروانه، اسپيشل سيڪريٽري اليڪشن ڪميشن آف پاڪستان ڊاڪٽر سيف آصف حسين اجلاس ۾ شريڪ ٿيا.
