ڪراچي: سعودي عرب، عمان ۽ متحده عرب امارات سميت 6 مختلف ملڪن مان گذريل 24 ڪلاڪن دوران وڌيڪ 48 پاڪستانين کي بيدخل ڪيو ويو آهي جڏهن ته ڪراچي ايئرپورٽ تي 38 مسافرن کي آف لوڊ ڪيو ويو.
اميگريشن ذريعن موجب سعودي عرب مان بليڪ لسٽ، بنا پاسپورٽ، سزا پوري ڪرڻ، وڌيڪ وقت تائين ڪم ڪرڻ، ڪفيل کان سواءِ ڪم ۽ ڪم کان پوءِ مفرور ٿيڻ تي 31 ڄڻن کي ڊي پورٽ ڪيو ويو.
عمان مان بليڪ لسٽ، ويزا ختم ٿيڻ ۽ غيرقانوني تي داخل ٿيڻ تي 12 ڄڻن کي بيدخل ڪيو ويو. جڏهن ته امارات مان 2، قطر مان هڪ ۽ آذربائيجان مان اميگريشن ناپسنديده قرار ڏئي هڪ پاڪستاني کي بيدخل ڪري ڇڏيو.
انهي کان علاوه عراق، عمان ۽ سعودي عرب جي وزٽ ويزائن تي ويل 3 مسافرن کي بليڪ لسٽ ٿيڻ تي آف لوڊ ڪيو ويو. عراق، يونان، آذربائيجان، سريلنڪا، ٿائيلينڊ ۽ فلپائن جي وزٽ ويزائن جي 13 مسافرن کي آف لوڊ ڪيو ويو جڏهن ته بحرين ۽ سعوديه جي ورڪ ويزائن جي 7 مسافرن کي به اڏامن مان لاٿو ويو.
