اسلام آباد: آءِ ايم ايف جو ٽيڪنيڪي وفد ڪلائميٽ فنڊنگ جي حوالي سان ڳالهين جي لاءِ اسلام آباد پهچي ويو آهي.
ذريعن موجب موسمياتي تبديلين جي اثرن کي منهن ڏيڻ جي لاءِ ڪلائميٽ فنڊنگ کي حاصل ڪرڻ جي معاملي ۾ اهم اڳڀرائي ٿي آهي، جنهن موجب عالمي مالياتي فنڊ(آءِ ايم ايف) جو ٽيڪنيڪي وفد ڪلائميٽ فنانسنگ تي ڳالهين جي لاءِ اسلام آباد پهچي ويو.
4 رڪني آءِ ايم ٽيڪنيڪي وفد وفاق ۽ صوبائي اختيارين سان ڳالهيون ڪندو. انهي دوران گرين بجٽنگ، ڪلائميٽ اسپينڊنگ پرٽيگنگ، ٽرڪنگ ۽ رپورٽنگ تي ڳالهيون ڪيون وينديون.
ڳالهين ۾ ايندڙ مالي سال 2025-26 جي لاءِ بجيٽ ۾ ڪاربن ليوي لڳائڻ جي باري ۾ به ڳالهيون ڪيون وينديون. ذريعن جو چوڻ آهي ته آءِ ايم ايف وفد سان ايندڙ ڳالهين جي دوران شروعاتي مسودي تي به ڳالهيون ڪيون وينديون.
آءِ ايم طرفان ڪاربن ليوي لڳائڻ جي باري ۾ به تجويزون فراهم ڪيون وينديون. انهي سلسلي ۾ اڄ کان 28 فيبروري تائين ٽيڪنيڪي سطح جون ڳالهيون وفاق ۽ صوبن سان ڪيون وينديون انهي دوران ڪاربن ليوي لڳائڻ، اليڪٽريڪل وهيڪل ۽ سبسڊي تي به ڳالهيون ڪيون وينديون.
ذريعن ٻڌايو ته آءِ ايم ايف وفد ايندڙ بجيٽ ۾ گرين بجيٽنگ کي وڌائڻ جي لاءِ به تجويزون ڏيندو. اڄ ڳالهين ۾ صرف ڪلائميٽ چينج جي لاءِ قدمن تي ڳالهيون ڪيون وينديون. پهرين ڏينهن جي انهي ڳالهين ۾ وفاق ۽ صوبن جي ڪلائميٽ چينج جي قدمن تي بريفنگ ڏني ويندي.
