ڪراچي: گوگل طرفان جي ميل استعمال ڪندڙن جي سيڪيورٽي کي وڌيڪ مضبوط بڻائڻ لاءِ ٽو فئڪٽر اوٿينٽيڪيٽ (ٽو ايف اي) سسٽم ۾ وڏي ڦيرڦار ڪئي پئي وڃي.
هڪ رپورٽ موجب، گوگل جلد ئي ٽو ايف اي لاگ ان لاءِ ٽيڪسٽ ميسيج ذريعي ڪوڊ موڪلڻ واري طريقي کي ختم ڪري ڇڏيندو، ان جي جاءِ تي، پاس ڪي ۽ ڪيو آر ڪوڊز جهڙن محفوظ طريقن کي ترجيح ڏني ويندي.
گوگل جي سيڪيورٽي ۽ پرائيويسي پبلڪ رليشن سربراهه روس رچنڊرفر تصديق ڪندي ٻڌايو آهي ته ڪمپني پاس ورڊ ختم ڪرڻ واري ويزن تي ڪم ڪري رهي آهي ۽ اهڙي طره لاگ ان جي تصديق لاءِ استعمال ٿيندڙ ايس ايم ايس ڪوڊز کي به ختم ڪيو پيو وڃي.
سندس چوڻ هو ته ته ايندڙ ڪجهه مهينن ۾ اهو طئي ڪيو ويندو ته فون نمبر جي تصديق ڪهڙي طريقي سان ڪئي وڃي.
هن وڌيڪ چيو ته جي ميل ۽ ٻين گوگل سروسز ۾ ڇهن انگن واري ايس ايم ايس ڪوڊ جي جاءِ تي ڪيو آر ڪوڊ متعارف ڪرايو ويندو، جنهن سان سيڪيورٽي وڌيڪ مضبوط ٿيندي ۽ واهپيدارن کي پنهنجي موبائيل آپريٽرز تي ڀاڙڻو نه پوندو.
رپورٽ موجب، گوگل کي ڄاڻ ملي آهي ته ايس ايم ايس ذريعي ٽو ايف اي ڪوڊ موڪلڻ سان هيڪرز کي ٻين اڪائونٽس تائين پهچ حاصل ڪرڻ ۾ مدد ملي ٿي، جيڪو سندن سيڪيورٽي لاءِ وڏو خطرو آهي.
جي ميل ۾ ٽو ايف اي جا ٻيا طريقا، جهڙوڪ جي ميل ايپ ذريعي لاگ ان جي تصديق يا گوگل اوٿينٽيڪيٽر، اڳ وانگر جاري رهندا، پر ٽيڪسٽ ميسيج ذريعي ڪوڊ موڪلڻ وارو آپشن ختم ڪيو ويندو.
