اسلام آباد: ابو ظهبي جو ولي عهد شهزادو شيخ خالد بن محمد بن زايدالنهيان پاڪستان پهچي ويو، وزيراعظم هائوس ۾ کيس گارڊ آف آنر پيش ڪيو ويو، ايوان صدر ۾ کيس نشان پاڪستان ايوارڊ سان نوازيو ويو.
رپورٽ موجب ولي عهد جي جهاز اسلام آباد ايئرپورٽ تي لينڊ ڪيو، ساڻش گڏ ابوظهبي جي وزيرن، ٻين اعليٰ اختيارين ۽ ڪاروباري شخصيتون به پاڪستان پهتيون آهن. وزيراعظم شهباز شريف ۽ صدر آصف علي زرداري، وفاقي وزيرن سميت ٻين اعليٰ شخصيتن معزز مهمانن جو ريڊ ڪارپيٽ تي استقبال ڪيو. ٻارن گلدستا پيش ڪيا.
ولي عهد ۽ انهي جو وفد ايئرپورٽ کان وزيراعظم هائوس جي لاءِ روانو ٿي ويو جتي اهو ملاقاتن ۾ گڏيل واپار ۾ اضافي سميت پاڪستان ۾ سرمائيڪاري جي معاملن تي ڳالهيون ڪندو.
وزيراعظم هائوس پهچڻ تي هٿياربند فوج طرفان کيس گارڊ آف آنر پيش ڪيو ويو. ولي عهد وزيراعظم هائوس مان ايوان صدر ويو جتي ولي عهد ابو ظهبي کي ايوان صدر ۾ نشان پاڪستان ڏيڻ جي تقريب منعقد ٿي جنهن ۾ صدر آصف علي زرداري کيس نشان پاڪستان جي اعزاز سان نوازيو.
