اسلام آباد: ابوظهبي جي ولي عهد شيخ خالد بن محمد بن زيد النهيان پاڪستان جو مختصر دورو مڪمل ڪري واپس روانو ٿي ويو، دوري دوران پاڪستان ۽ گڏي عرب امارات (يو اي اي) وچ ۾ مفاهمتي يادداشتن ۽ معاهدن تي صحيحون ڪيون ويون، جڏهن ته صدر مملڪت ولي عهد کي نشانِ پاڪستان جي اعزاز سان نوازيو.
شيخ خالد بن محمد بن زايد النهيان سرڪاري دوري تي پاڪستان پهتو آهي جتي نور خان ايئربيس تي وزيراعظم شهباز شريف، صدر آصف زرداري ۽ خاتون اول آصفه ڀٽو معزز مهمان جو آڌر ڀاءُ ڪيو.
وزيراعظم هائوس ۾ ابوظهبي جي ولي عهد کي گارڊ آف آنر به پيش ڪيو ويو.
شيخ خالد بن محمد بن زايد النهيان سان گڏ هڪ اعليٰ سطحي وفد به دوري تي آيو.
وزيراعظم هائوس ۾ پاڪستان ۽ يو اي اي وچ ۾ مفاهمتي يادداشتن ۽ معاهدن جي تقريب ٿي، جنهن ۾ بينڪنگ شعبي ۾ سهڪار لاءِ دستاويزن جي ڏي وٺ ڪئي وئي.
ٻنهي ملڪن وچ ۾ معدنيات جي شعبي ۾ به سهڪار وڌائڻ جو معاهدو ٿيو، جڏهن ته ريلوي واري شعبي ۾ به ٻن مفاهمتي يادداشتن تي صحيحون ڪيون ويون.
انفراسٽرڪچر جي شعبي ۾ سيڙپڪاري لاءِ به ٻنهي ملڪن وچ ۾ دستاويزن جي ڏي وٺ ڪئي وئي.
ولي عهد ان کانپوءِ ايون صدر پهتو، جتي کيس نشانِ پاڪستان سان نوازيو ويو، تقريب ۾ وزيراعظم شهباز شريف، وفاقي ڪابينا جا ميمبر ۽ اعليٰ علمدار شريڪ ٿيا.
ابوظهبي جو ولي عهد شيخ خالد بن محمد بن زيد النهيان پنهنجو مختصر دورو مڪمل ڪري ڏيهه واپس روانو ٿي ويو، جتي وزيراعظم شهباز شريف کيس الوداع ڪيو.
