واشنگٽن: واٽس ايپ طرفان گذريل سال نومبر جي آخر ۾ واٽس نوٽ ٽرانسڪرپشن فيچر متعارف ڪرائڻ جو اعلان ڪيو ويو هو، جيڪو هاڻي سڄي دنيا جي صارفين لاءِ پيش ڪيو ويو آهي.
اهو فيچر اينڊرائيڊ استعمال ڪندڙن لاءِ مهيا ڪيو ويو آهي، جڏهن ته آءِ فون صارفين کي ٿورو وڌيڪ انتظار ڪرڻو پوندو.
هي فيچر اهڙن صارفين لاءِ انتهائي ڪارائتو ثابت ٿيندو، جيڪي ڪنهن اهڙي جاءِ تي آڊيو پيغام ٻڌي نه ٿا سگهن، جتي ڀرپاسي تمام گهڻو گوڙ هوندو آهي.
واٽس ايپ جو هي نئون فيچر وائس نوٽ کي لکت يعني ٽيڪسٽ ۾ تبديل ڪري ڇڏيندو، جنهن سان واهپيدار گوڙ واري ماحول ۾ آڊيو ٻڌڻ بدران ان کي پڙهي سگهن ٿا.
واٽس نوٽس واٽس ايپ جي سڀ کان وڌيڪ مقبول فيچرن مان هڪ آهي، هڪ اندازي موجب 70 سيڪڙو صارفين وائس ميسيج موڪليندا آهن.
ڪڏهن ڪڏهن گڏجاڻين، سفر يا گوڙ واري جاءِ تي آڊيو ٻڌڻ ۾ ڏکيائي پيش ايندي آهي، جنهن جو حل واٽس ايپ هن فيچر جي صورت ۾ پيش ڪيو آهي.
فيچر کي فعال ڪرڻ لاءِ سڀ کان پهريان واٽس ايپ جو تازو ورزن اپڊيٽ ڪرڻ ضروري آهي.
ان کانپوءِ واٽس ايپ سيٽنگز ۾ وڃي چيٽ آپشن کوليو، پوءِ هيٺ اسڪروِل ڪري وائس ميسيج ٽرانسڪرپٽ کي فعال ڪريو.
هاڻي جيڪو وائس ميسيج ٽرانسڪرائب ڪرڻ چاهيو ٿا، ان کي پلي ڪريو، ڪجهه سيڪنڊن تائين دٻائي رکو ۽ ”مور آپشنز“ مان ”ٽرانسڪرائب“ تي ڪلڪ ڪريو.
جڏهن اوهان وائس ميسيج ٻڌڻ شروع ڪندئو ته هي فيچر پاڻمرادو ان جو ٽيڪسٽ جي صورت ۾ ڏيکارڻ شروع ڪندو.
هن فيچر ذريعي اوهان ڪنهن به آڊيو پيغام ۾ موجود اهم ڄاڻ، جهڙوڪ ائڊريس، فون نمبر يا ڪنهن تقريب جو وقت آسانيءَ سان حاصل ڪري سگهو ٿا، بس لاڳاپيل ٽيڪسٽ کي ڪاپي ڪري نوٽس يا ڪئلينڊر ۾ محفوظ ڪريو.
هن وقت هي فيچر انگريزي ۽ ڪجهه ٻين ٻولين ۾ موجود آهي، پر سنڌي سپورٽ في الحال دستياب نه آهي.
