سوات: پاڪستان مسلم ليگ(ن) خيبرپختونخواهه جي صدر ۽ وفاقي وزير امير مقام چيو آهي ته اڳوڻي وزيراعظم عمران خان کي يوڪريني صدر زيلنسڪي سان آمريڪي صدر ڊونلڊ ٽرمپ جي رکيل رويي مان سبق سکڻ گهرجي.
وفاقي وزير ۽ مسلم ليگ(ن) جي صدر خيبرپختونخواهه جي امير مقام سوات جي علائقي اسلام پور ۾ نادرا سينٽر جي افتتاح کان پوءِ عوامي اجتماع کي خطاب ڪندي چيو ته عمران احمد خان نيازي کي ڊونلڊ ٽرمپ جي يوڪريني صدر سان رکيل رويي مان سبق سکڻ گهرجي.
هن چيو ته عمران خان جي خطن جو انجام صرف باسڪٽ ئي ٿيندو. ڪوبه پڙهڻ وارو ناهي، عوام ذاتي مفادن تي ٻڌل اتحادين کي چڱي ريت سمجهي ٿو.
امير مقام چيو ته جيڪڏهن اتحاد ٺاهڻو آهي ته دهشتگردي، معاشي استحڪام ۽ بيروزگاري جي خاتمي لاءِ ٺاهيو اپوزيشن کي سول ملٽري الائنس هضم نه پيو ٿئي. وفاقي وزير خطاب ۾ چيو ته ايندڙ عام چونڊون 2029 ۾ ئي ٿينديون، اپوزيشن تيستائين انتظار ڪري.
