اسلام آباد:پاڪستان کي 7 ارب ڊالر بيل آئوٽ پيڪيج مان هڪ ارب ڊالر جي ٻئي قسط جي ادائيگي جي حوالي سان اقتصادي جائزي جي لاءِ آءِ ايم ايف جو جائزه مشن پاڪستان پهچي ويو.
ذريعن موجب اسلام آباد پهچڻ تي ناڻي واري سيڪريٽري جي سربراهي ۾ وفد آءِ ايم ايف اختيارين سان ملاقات ڪئي. پاڪستان ۽ آءِ ايم ايف جي وچ ۾ ڳالهيون 2 هفتن تائين جاري رهنديون. آءِ ايم ايف وفد جي اڳواڻي ناٿن پورٽر ڪندو. جڏهن ته وفاقي ناڻي وارو وزير محمد اورنگزيب پاليسي ليول ڳالهين ۾ پاڪستاني وفد جي اڳواڻي ڪندو.
ذريعن ٻڌايو آهي ته آءِ ايم ايف وفد ناڻي واري وزارت، ايف بي آر، پاور ڊويزن ۽ اسٽيٽ بينڪ اختيارين سان به ڳالهيون ڪندو. ذريعن جو چوڻ آهي ته پاڪستان 7 ارب ڊالر قرض پروگرام جي شرطن تي عمل ڪرڻ جي رپورٽ پيش ڪندو. هلندڙ مالي سال جي پهرين ڇهن مهينن بابت رپورٽ آءِ ايم ايف کي پيش ڪئي ويندي ۽ وفد کي زرعي آمدني تي ٽيڪس تي بريفنگ ڏني ويندي.
ذريعن موجب آءِ ايم ايف کي پراپرٽي سيڪٽر تي ٽيڪسز بابت آگاهه ڪيو ويندو ۽ ريٽيلرز کي ٽيڪس نيٽ ۾ آڻڻ جي شرط تي عمل ڪرڻ جي رپورٽ به پيش ڪئي ويندي. ذريعن ٻڌايو آهي ته ڳالهين کان پوءِ آءِ ايم ايف وفد پاڪستان کي 1.1 ارب ڊالر جاري ڪرڻ جي باري ۾ سفارشون جوڙيندو.
