بنون: بنون ۾ گذريل رات فتنه الخوارج جي حملي ۾ 12 شهري شهيد، 32 زخمي ٿي پيا جڏهن ته آپريشن دوران 6 خوارج دهشتگرد پڻ مارجي ويا، سيڪيورٽي فورسز ريسڪيو آپريشن مڪمل ڪري ورتو آهي.
سيڪيورٽي ذريعن موجب فتنه الخوارج جي بنون ڪينٽ تي حملي جي نتيجي ۾ معصوم شهرين جي شهادتن جو انگ وڌي 12 جڏهن ته زخمين جو انگ 32 ٿي چڪو آهي. 3 معصوم شهري مسجد ۾ شهيد ٿيا جڏهن ته ٻيا بارودي ڌماڪي سبب بازار ۾ ڦاٽندڙ گاڏي جي ڪري عمارت پٽ پوڻ سبب شهيد ٿيا. رپورٽن موجب ڪالهه افطار وقت دهشتگردن بنون ڪينٽ ۾ داخل ٿيڻ جي ناڪام ڪوشش ڪئي، دهشتگردن بارود سان ڀريل 2 گاڏيون بنون ڪينٽ جي ڀت سان ٽڪرائي ڇڏيون، خوارج دهشتگردن بازار ۾ رش ۽ سيڪيورٽي فورسز جي ڪارروائي ٿيڻ سبب گاڏيون گهبراهٽ ۾ ڀت سان ٽڪرائي ڇڏيون.
ذريعن ٻڌايو ته دهشتگردن جي بارود سان ڀريل گاڏين جي ڌماڪي سبب ويجهي مسجد به شهيد ٿي وئي، ڌماڪي سبب ويجهي گهر جي ڇت ڪرڻ سبب 12 شهري شهيد ۽ 30 زخمي ٿيڻ جا اطلاع آهن. سيڪيورٽي ذريعن جو چوڻ آهي ته مختلف انٽري پوائنٽس تي موجود سيڪيورٽي عملي 6 خوارج دهشتگردن کي مقابلي ۾ ماري ڇڏيو.
گڏيل رپورٽن موجب فتنه الخوارج جي ٻين ساٿين جو فون تي افغانستان سان رابطو آهي. سيڪيورٽي ذريعن جو چوڻ آهي ته آخري خارجي جي خاتمي تائين سيڪيورٽي فورسز جو ڪليئرنس آپريشن جاري رهندو.
ريسڪيو 1122 موجب بنون ۾ ريسڪيو آپريشن مڪمل ڪيو ويو آهي جنهن دوران ملبي هيٺيان دٻيل سمورن ماڻهن کي ڪڍي اسپتال منتقل ڪيو ويو آهي. آپريشن جي نگراني ڊسٽرڪٽ ايمرجنسي آفيسر ڪئي جڏهن ته ڊسٽرڪٽ ايمرجنسي آفيسر ڪرڪ به موقعي تي موجود رهيو. انهي دوران ريسڪيو 1122 جو ميڊيڪل ٽيڪنيشن عملو واقعي واري هنڌ ۽ اسپتال ۾ زخمين کي فوري طبي امداد فراهم ڪندا رهيا.
