واشنگٽن: آمريڪي صدر ڊونلڊ ٽرمپ افغانستان ۾ دهشتگردي جي خلاف پاڪستان جي تعاون تي ٿورو ادا ڪري ڇڏيو آهي.
ڪانگريس سان پنهنجي ڊگهي خطاب ۾ آمريڪي صدر ڊونلڊ ٽرمپ چيو ته انتها پسند دهشتگردن جي خلاف جنگ جاري آهي ۽ اهو اعلان ڪندي خوشي محسوس ٿي رهي آهي ته افغانستان ۾ هڪ وڏو دهشتگرد گرفتار ڪيو ويو آهي.
آمريڪي صدر پاڪستان جي تعريف ڪندي چيو ته مان پاڪستان جي حڪومت جو خاص طور تي ٿورو ادا ڪرڻ چاهيان ٿو ڇو ته انهي دهشتگرد جي گرفتاري ۾ پاڪستان اهم ڪردار ادا ڪيو آهي. هن وڌيڪ چيو ته ساڍا 3 سال اڳ داعش 13 آمريڪين کي افغانستان ۾ قتل ڪيو هو، هاڻ انهي ڏوهاري کي آمريڪا آڻي قانون موجب سزا ڏني ويندي.
آمريڪي خبرون ڏيندڙ ايجنسي موجب 2021 ۾ افغانستان ۾ ٿيل بم ڌماڪي ۾ 13 آمريڪي فوجي اهلڪار مارجي ويا هئا، بم ڌماڪي جو ماسٽر مائنڊ داعش جي ڪمانڊر شرف الدين کي قرار ڏنو ويو هو. آمريڪي صدر موجب ايف بي آءِ، ڊي او جي ۽ سي آءِ اي جي مدد سان انهي دهشتگرد کي افغانستان مان گرفتار ڪيو ويو هو. ٽرمپ محمد شريف الدين جي گرفتاري تي پاڪستان جي مدد جو ٿورو ادا ڪيو آهي.
صدر ٽرمپ پنهنجي خطاب ۾ افغانستان مان آمريڪي فوجين جي واپسي کي انتهائي شرمناڪ قرار ڏنو. ٽرمپ موجب اهو فيصلو آمريڪا جي پوزيشن ۽ سيڪيورٽي پاليسي تي منفي اثر وجهي سگهي ٿو. آمريڪي صدر ڪانگريس سان هڪ ڪلاڪ 38 منٽ ۽ 31 سيڪنڊن جو ڊگهو ترين خطاب ڪيو جيڪو آمريڪي تاريخ ۾ هڪ نئون رڪارڊ آهي. انهي کان اڳ 1993 ۾ صدر بل ڪلنٽن هڪ ڪلاڪ 5 منٽن جو خطاب ڪيو هو.
