پشاور: خيبرپختونخواهه جي گورنر فيصل ڪريم ڪنڊي صوبي ۾ رمضان المبارڪ جي دوران لوڊشيڊنگ جي معاملي تي وزيراعظم کي خط لکي ڇڏيو آهي.
فيصل ڪريم ڪنڊي وزيراعظم شهباز شريف کي خط ۾ لکيو ته خيبرپختونخواهه صوبو وڏي مقدار ۾ بجلي ۽ قدرتي گيس پيدا ڪندڙ صوبو آهي پر اسان جي وسيلن مان پيدا ٿيل بجلي ۽ گيس کان اسان جي صوبي کي ئي محروم رکيو پيو وڃي.
هن خط ۾ لکيو ته رمضان المبارڪ ۾ بجلي ۽ گيس جي لوڊشيڊنگ عوام جون اهنجون وڌائي ڇڏيون آهن. بطور وزيراعظم اوهان جي طرفان بجلي ۽ گيس جي لوڊشيڊنگ ختم ڪرڻ واري اعلان تي عمل نه پيو ڪيو وڃي. سحري، افطاري ۽ عبادت جي وقت ۾ بجلي ۽ گيس جي لوڊشيڊنگ سبب شهري اذيت ۾ مبتلا ٿي ويا آهن.
ڪي پي ڪي جي گورنر خط ۾ مطالبو ڪيو ته رمضان جو تقدس انهي ڳالهه جي گهر ڪري ٿو ته شهرين کي پرسڪون ماحول فراهم ڪيو وڃي.
