اسلام آباد: وفاقي ڪابينا جي نون چونڊيل مملڪتي وزيرن ۽ صلاحڪارن کي قلمدان ڏيڻ جي معاملي تي وزيراعظم شهباز شريف مشاورت مڪمل ڪري ورتي آهي.
رپورٽ موجب ذريعن ٻڌايو آهي ته سڀاڻي نون چونڊيل وزيرن کي قلمدان ملڻ جو امڪان آهي. وزيراعظم جي صلاحڪار محمد علي کي نجڪاري، وفاقي وزير علي پرويز ملڪ کي پيٽروليم جي وزارت ملڻ جو امڪان آهي.
ذريعن جو چوڻ هو ته ڊاڪٽر مصدق ملڪ کي ماحولياتي تبديلي، ڊاڪٽر توقير کي ڪابينه ۽ اسٽيبلشمينٽ ڊويزن جي وزارت ملڻ جو امڪان آهي. ذريعن ٻڌايو آهي ته حنيف عباسي کي ريلوي، مصطفيٰ ڪمال کي سائنس اينڊ ٽيڪنالاجي، رضا حيات براج کي پارلياماني معاملا ۽ خالد مگسي کي پاڻي واري وزارت ملڻ جو امڪان آهي.
ذريعن موجب پرويز خٽڪ کي بين الصوبائي رابطه، ڊاڪٽر طارق فضل چوڌري کي صحت واري وزارت، شيزه فاطمه کي آءِ ٽي واري وزارت ملڻ جو امڪان آهي. ياد رهي ته 27 فيبروري تي وفاقي ڪابينه ۾ واڌ ڪئي وئي هئي نئين شامل ٿيندڙ وفاقي وزيرن ۽ مملڪتي وزيرن حلف کنيو هو.
