اسلام آباد: دفاع واري وزير خواجه آصف چيو آهي ته اڳوڻو ڊي جي آءِ ايس آءِ فيض حميد ته گرفتار آهي، اڳوڻي آرمي چيف جنرل قمر جاويد باجوه کان پڇو وڃي ته انهن دهشتگردن کي پاڪستان ۾ ڇو ترسايو.
پارليامينٽ هائوس ۾ صحافين سان ڳالهيون ڪندي خواجه آصف چيو ته دهشتگردي سڄي دنيا جو مسئلو آهي، جنهن کي گڏجي حل ڪرڻو پوندو. دهشتگردي روڪڻ ۾ ناڪامي ڏسڻ لاءِ پهريان ڪي پي ڪي حڪومت جي انڪوائري ٿيڻ گهرجي.
عمران خان طرفان آمريڪي صدر ڊونلڊ ٽرمپ کي خط لکڻ بابت سوال تي وفاقي وزير جو چوڻ هو ته پهريان خط پاڪستان ۾ لکيا ويندا هئا هاڻ انهن کي عالمي درجو ڏنو ويو آهي، پهريان جيڪو خطن جو حشر ٿيو هو هنن خطن جو به ساڳيو ئي حشر ٿيندو، هن چيو ته مان ڪنهن کي مشورو نه ڏيندو آهيان، اهي مشوري کان مٿانهان آهن، هنن ماڻهن جا جادو منتر جا مشورا ٿي سگهن ٿا ٻئي ڪابه ڳالهه نٿي ٿي سگهي.
خواجه آصف چيو ته مفاهمت جي سياست اتي ٿيندي آهي جتي ٻئي ڌر حملي آور نه هجي. مان اسٽيبلشمينٽ جي نمائندگي يا انهن جي طرفان ڪابه ڳالهه نه ڪري رهيو آهيان جيڪڏهن مفاهمت نه ٿئي ته پوءِ اوهان کي مزاحمت جي سياست ڪرڻ گهرجي. دفاع واري وزير چيو ته دهشتگردي جي ذميواري خيبرپختونخواهه جي حڪومت به کڻي. خيبرپختونخواهه پي ٽي آءِ باني جي جنگ وڙهي رهيو آهي، ڪي پي ڪي حڪومت دهشتگردي جي خلاف ڪجهه نه پئي ڪري. ملڪ ۾ دهشتگردي جي وڌندڙ واقعن تي دفاع واري وزير خواجه آصف چيو ته دهشتگردن کي واپس ترسائڻ ۾ جنرل باجوه جو به ڪردار هو. جنرل باجوه جنرل فيض حميد ۽ پي ٽي آءِ باني دهشتگردن کي واپس پاڪستان ۾ ترسايو. هن وڌيڪ چيو ته هن وقت فيض حميد ته گرفتار آهي جنرل باجوه کان پڇيو وڃي ته انهي دهشتگردن کي پاڪستان ۾ ڇو ترسايو.
