اسلام آباد: گهريلو صارفين جي لاءِ گيس جي قيمت ۾ 200 سيڪڙو تائين واڌ جي باوجود ملڪ جي مختلف علائقن ۾ گيس جي بدترين لوڊشيڊنگ جو سلسلو جاري آهي.
حڪومت پهرين نومبر کان گيس جي قيمتن ۾ تقريبن 200 سيڪڙو تائين واڌ ڪئي هئي جنهن جي ڪري صارفين کي ڳرا بل وصول ٿي رهيا آهن. گيس جي قيمتن ۾ تازي واڌ شهرين جي پريشانين ۾ وڌيڪ اضافو ڪري ڇڏيو آهي.
نومبر ۾ قيمتن ۾ 200 سيڪڙو واڌ کان پوءِ رڪارڊ وڌيل بل ڏسي عوام جون رڙيون نڪري ويون، صارفين چيو آهي ته گذريل مهينن ۽ سال جي نسبت بلن ۾ تمام گهڻو فرق آيو آهي.
صارفين جو چوڻ آهي ته پهريان بجلي جي قيمتن زندگي مشڪل ڪري رکي هئي هاڻ رهيل ڪسر گيس جي بلن پوري ڪري ڇڏي آهي.
